LAOAG CITY -Ilunglungalong ti Agricultural Credit Policy Council ti Department of Agriculture (DA-ACPC) ti alisto pannakaipaay ti pondo para iti panagrekobre dagiti mannalon a naapektaran kadagiti nagsasaruno a bagyo ken epekto ti habagat a nangitunda ti nalawa a layos iti Inl
Inbatad ni Agriculture Secretary Francisco P. Tiu Laurel Jr. a napateg ti alisto a pannakaiproseso ti pondo gapu ta kasapulan dagiti mannalon ti pagpuunan tapno maurnus dagiti nadadael a pagtatalunan ken agtultuloy nga umado ti produksyon da sakbay ti sumaruno a panagapit.
Innayon na a no alisto a makautang dagiti mannalon ket nasapsapa da met a makamula manen, al-alisto da a masubbot ti mapastrek da ken makatulong iti panagtultuloy ti pannakaipaay ti taraon kadagiti aggatang.
Kuna na pay a ti panangtulong kadagiti mannalon a makabangon a dagus ket maysa met a panagpuunan para iti food security.
Mainaig iti daytoy, ti pannakaipatungpal ti AGRI-RECOVER ket kalpasan ti nalawa a layos a nangitunda ti P4.38 bilyon a perdisyon iti agrikultura ken panagkalap, a nakaapektar ti sumuruk-kumurang a 99,000 a mannalon ken mangngalap ken 81,000 nga ektarya.
Ti AGRI-RECOVER ket nadisenyo tapno supusupan ti pagkurkurangan iti financing, a mangipalubos kadagiti apektado a prodyuser a mangrugi manen iti nasapsapa imbes nga itantan ti panagmula kabayatan nga iyur-uray ti kaadda manen ti pagpuunan.
