LAOAG CITY – Dead on Arrival ti maysa a lalaki kalpasan a nadungpar iti National Road ti Brgy. Suyo iti ili a Dingras.
Nabigbig ti biktima a ni Alladin Ballesteros y Paltong, agtawen ti 55, awanan asawa, mannalon ken residente iti nadakamat met laeng a barangay idinto ti nakadungpar kenkuana ket ti Isuzu Fuego pick-up nga inturong ni Silver Al Aquino y Juan, agtawen ti 33, naasawaan, mangisursuro ken residente iti Brgy. Mariquet iti ili a Solsona.
Basar iti imbestigasyon, bayat nga agpa-laud a direksion ti pick up idi ta kellaat a bimallasiw ti biktima iti kalsada.
Gapu iti daytoy, nagsagaba ti biktima ti sugsugat kadagiti nagduduma a paset ti bagina rason iti pannakatay na idinto a saan met a naan-ano ti driver ti pick-up.
Iti agdama, adda iti kustodyar ti PNP Dingras ti driver ti pick up ken ti lugan na kalpasan a boluntaryo a simmuko.
