LAOAG CITY – Manamnama a maidanun iti daytoy a rabii, dagiti naukkon a tulong ti Ylocandia Biyaheroes Rider Club a nakabase iti ili ti San Nicolas idiay Batangas.
Immunan nga inpakaammo ni Mr. Jason Santiago, mangidadaulo iti nasao a grupo, a makaumanay ti naukkon a tulong para iti maysa nga evacuation center iti nasao a probinsya.
Malaksid iti daytoy, bayat ti panagturong ni Santiago idiay Batangas ket dagasen na dagiti naukkon dagiti kakadwa da a riders iti Ilocos Sur ken iti Pangasinan.
Mangnamnama ni Santiago nga adu met dagiti naukkon a tulong dagiti kakadua da a rider kadagiti nasao a probinsya tapno ad-adu met dagiti mabunongan iti relief goods kas iti arwaten ken danum a biktima ti panagbettak ti Taal volcano.
Maipalagip nga inbunannag ni Santiago a subad da ti maited a tulong iti napintas a panangtaripato kadakuada dagiti Batangueño idi nagtalinaed da iti sumagmamano nga aldaw bayat ti pannakipagpaset da iti Philippine Loop, pananglikos da ti Pilipinas usar ti motorsiklo nga aktibidad ti Department of Tourism.
