LAOAG CITY – Nasayaaten ti kondisyon ni Sangguniang Bayan Member Mark Dennis Del Castillo bayat a maag-agasan iti Mariano Marcos Memorial Hospital and Medical Center iti siudad ti Batac.
Daytoy ket kalpasan a naaksidente idi kalman gapu ti pannakaregreg ti inturong na a lugan iti derraas a paset ti Solsona Apayao Road iti Brgy. Manalpac iti nasao nga ili.
Segun kenni Police Major Arnel Tabaog, hepe ti PNP Solsona, adda ti nakita dagiti doktor a maipagarup a nafracture iti bukot na ken naitupa ti akin kannigid a paset ti rupa na.
Inlawlawag ni Tabaog a napukawan ti kontrol ni Del Castillo kalpasan a bimtak ti ligay ti lugan na sakbay a nadesgrasya iti sharp curve iti nasao a kalsada.
Kuna na a nagserbi dagiti dua a kayo a saripda iti diretso kuma a pannnakatennag na iti naun-uneg a paset ti derraas.
Kabayatanna, inrekomendar ni Tabaog kadagiti agturturong iti Apayao Road a nasken a nakakondisyon kangrunaan iti preno dagiti lugan.
Maipalagip nga agarup 50 agingga iti 70 a metros ti kauneg ti nakatennagan ti lugan ni Del Castillo.
