LAOAG CITY – Umaboten ti tallo nga aldaw nga awan ti mapan agideldeliver kadagiti nagduduma a produkto iti maysa a dakkel a grocery iti sentro ditoy ciudad ti Laoag.
Daytoy ti kinumpirmaran ni Assistant Store Manager Gladys Cabacungan ditoy ciudad.
Segun ken ni Cabacungan, arigna blangko aminen dagiti pagyanan ti lako da gapu iti kaado dagiti napan naggatang iti kallabes idinto a tallo metten nga aldaw nga awan ti naideliver kadakuada.
Karaman kadagiti kangrunaan a naibusen a lako da ket dagiti noodles, de lata, nagduduma a klase ti disinfectant kas ti alcohol ken dadduma pay.
Inbatad na nga ado pay dagiti LGUs a nagpareserba kadagiti nasao a produkto ngem agpapan ita ket awan pay ti simmangpet.
Naamoan da a dagiti ar-aramiden ti Manufacturing company ket alisto a maibus ken uray adda ti maideliver ket marigatan latta dagiti maseknan gapu iti pannakaipatungpal ti total lockdown iti malabsan da a probinsya.
Innayon na a dagiti nabatbati a lako da iti agdama ket isu ti naudi nga stocks da.
