LAOAG CITY – Nauram ti maysa a shopping Mall ditoy ciudad ti Laoag partikular ti bodega ti pasdek nga adda iti maikatlo a kadsaaran.
Segun kenni Fire Supt. Floro Obrero, ti Provincial Fire Marshall ti BFP nga immabot it maikapat nga alarma ti nasao nga uram no sadinno nga agbasar da iti fire truck a nagresponde.
Kunana nga agarop 20 nga fire truck ti nagresponde iti uram pakairaman dagiti pribado a sektor ken dagiti BFP stations, kasta pay ti Prime Water ken ti boomtruck ti DPWH.
Naamoan a narigatan dagiti bombero no sadinno ket dinadael da pay dagiti tawa ti pasdek tapno masebseban ti uram.
Inbatad na a dagiti nagresponde a fire truck ket nakapalawlaw iti sibubukel a pasdek tapno masigurado nga awan ti mairaman a dadduma pay a pasdek negosyo.
Dinakamat pay ni Obrero ti maikatlo a kadsaaran ket isu ti agserserbi a bodega no sadinno ket napunno ti lupot ken dadduma pay a lako ti pasdek.
Innayon na nga iyuswat da met ti nauneg nga imbestigasyon tapno madeterminar no anya ti namunganayan ti nasao nga uram.
Mainaig iti daytoy, nabalakadan met dagiti kaabay a pasdek negosyo a saan pay laeng nga agoperar ita nga aldaw no sadinno ket inruwar da metten dagiti sumagmamano a lako da gapo iti panagamak a mairaman.
