LAOAG CITY – Inadmitir ni Dr. Rogelio Balbag, health consultant ti gobierno probinsial a bassit pay dagiti nabakunaan kontra ti covid-19 ditoy probinsya.
Segun ken ni Balbag, umabot pay laeng iti 10,465 ti a karaman iti “A1 priority list” ti nabakunaan ti first dose idinto a pito a ribo ti nakaileppas ti dua a dose.
Kuna na a ti nasao a bilang ket bassit pay no maidasig iti pakabuklan dagiti adda iti babaen ti A1 kas kadagiti frontliners a pakaibilangan dagiti BHERT’s, BHW ken dagiti adda iti border ken quarantine facilities.
Inbunannagna a dagiti adda iti “A2 priority list” wenno dagiti senior citizens nga umabot iti 51,429 ket 9,270 ti nakaawat ti first dose idinto a dagiti nabakunaanen iti second dose ket 2,702.
Imbatad ni Balbag a nababa unay ti bilang dagiti nabakunaan rason a gutgutigutenna dagiti senior citizens nga agpabakuna.
Inlawlawag na pay a kadagiti adda iti A3 wenno dagiti addaan ti comorbidities ket puntiria a mabakunaan ti 34,900.
Nu pay kasta, kuna na a 5,413 pay laeng ti nabakunaan ti first dose iidnto a 352 ti nakaawat ti second dose.
Mainaig iti daytoy, inpetteng ti provincial health consultatnt a ti panagbakuna ti katalgedan a mangsalaknib iti tunggal maysa manipud iti COVID-19.
