LAOAG CITY – Inbatad ni Barangay Chairwoman Marie Rose dela Cruz iti Barangay Cabungaan-B ditoy ciudad ti Laoag a maysa laeng a benepisyaryo ti TUPAD wenno Tulong Panghanapbuhay sa Ating Disadvantaged/Displaced Workers ti nagpositibo ti covid-19 iti barangay da.
Segun ken ni dela Cruz, idi laeng kalman, Setyembre 5 a naideklarar a positibo ti nasao a virus ti TUPAD beneficiary iti barangay da.
Innayon na a sakbay pay a naamoan a positibo ti virus ket saanen a nagtrabaho wenno rimrimuar gapu ta immuna a nagpositibo ti ina ti maseknan.
Inadmitir ti kapitana nga idi kalman ket napan pay laeng nagdalos dagiti dadduma a TUPAD beneficiaries a secondary contact ti ngpositibo ngem apaman a naipakaammo kenkuana ket pinagsardeng na a dagus dagitoy ken inbilin na nga ag-isolate dagitoy agingga a saan a rumuar ti resulta ti swab test da.
Reaksyon daytoy ni Kapitana dela Cruz mainaig iti naidanun a reklamo ditoy Bombo Radyo Laoag a maipagarop a mapan lattan agdaldalos dagiti TUPAD beneficiaries uray ammo da a primary contact dagitoy.
