LAOAG CITY – Inpasingked ni Mrs. Nelda Casas, ti OIC ti Budget Office ditoy ciudad ti Laoag a saan a makaapektar iti PS CAP limitation ti pannakaestablisar dagiti baro a posisyon gapo iti devolution transition plan.
Segun kenni Casas, saan nga agbalin a problema ti kaaawan pay ti approval ti computation para iti exemption iti PS CAP limitation ti devolve function ti lokal a gobierno.
Ti PS CAP limitation ket nakaipalaonan ti sweldo dagiti empleado ti lokal a gobierno no sadinno a manipud iti Annual Budget ti First-Third Class Municipalities ken Cities ket 45 a porsiento ti mailatang para iti sweldo dagiti maseknan.
Kadagiti met Fourth-Sixth Class Municipalities and Cities ket 55 a porsiento manipud iti Annual Budget ti lokal a gobierno ket para iti sweldo dagiti empleado.
Naamoan a gapo ta adda ti maestablisar a posisyon gapo iti devolution plan ket masapol a makita no lumabes ti limitasyon no mainayun ti sweldo dagiti baro a posisyon.
Kabayatanna, naipasa metten ti resolusyon a mangaprubar ti devolution transition plan ditoy ciudad para iti napinpintas a pannakaimplmentar ti function, services ken dagiti pasalidad para iti naan-anay a panag-devolved ti ciudad babaen kadagiti national agencies a mangrugi intono 2022.
