LAOAG CITY – Maragsakan ni SK Federated President Gabrielle Daguio iti ciudad ti Batac iti pannakaipasan iti maikadwa a pannakabasa na iti kamara de representantes ti nailungalong a gakat para iti pannakaipaay ti sweldo para kadagiti SK kagawad ditoy pagilyan.
Maipalagip a ti linteg a naipasa idi 2015 ket dagiti laeng SK chairman ti agsweldo ken maipaayan ti Civil Service Elligibility.
Inlawlawag ni Daguio a nabayagen a tartarigagayan da a masweldoan uray bassit laeng dagiti adda iti babaen da gapu ta isuda ti katulungan da iti amin a trabaho da nga SK chairman.
Innayon na a narigat ti sitwasyon dagiti SK kagawad no awan pulos ti maited kadakuada nga abasto da nga agtrabaho.
Kuna pay ni Daguio a dagiti SK kagawad ti maibilang a backbone ti SK council.
Mangnamnama ni Daguio a mapagbalin a naan-anay a linteg ti nasao a gakat gapu ta dakkel a makatulong para kadagiti agserbi nga SK kagawad.
