LAOAG CITY – Dismayado ni House Deputy Minority leader ken Bayan Muna Rep. Carlos Isagani Zarate gapo ta saan a nagatendar dagiti inimbitaran da a sekretaryo kadagiti maseknan nga ahensya iti taripnong da idi kalman.
Daytoy ket pakaseknan pay laeng iti agtultuloy a panagngato ti presyo dagiti produkto a petrolyo ken ti kalikagom da a pannakipasa ti House Bill 10488.
Iti ekslusibo a pannakinnuman ti Bombo Radyo Laoag kenni Zarate, kunana dagiti laeng nagatendar ket dagiti undersecretaries dagiti ahensya isut gapo na a saan a makaanay para kenkuana dagiti nagbalin a sungbat dagitoy.
Karaman iti komite a nagtataripnong ket ti Committee on Energy, Committee on Ways and Means, ken Committee on Economic Affairs ken Committee in Transportation.
Inpetteng ni Zarate a ti pannakaipasa ti House Bill 10488 gapo ta dakkel a makatulong daytoy iti publiko.
Ti House Bill 10488 ket gagem na a masuspenso pay laeng iti uneg ti innem a bulan ti taxes nga inimporsar ti TRAIN Law kangrunaan na iti excise tax iti produkto a petrolyo.
Mainaig iti daytoy, kuna ni Zarate a ti maysa kadagiti nagbalin a resolusyon ti joint committees ket irekomendar kenni Pres. Rodrigo Duterte bga agpaawag ti special session iti kongreso gapo ta saan dan a mabalin nga urayen nga intono pay laeng Mayo 23 ti pannakatratar daytoy.
Inbatad ni Zarate a masapol a marepaso ti Oil deregulation law ken umannugot iti rakurak ti Malakanyang a masapolen a marepaso daytoy gapo ta daytoy ti puon ti daytoy a problema.
Kabayatanna, kuna pay ni Zarate a ti pannakarepaso ti Oil Deregulation Law ti dakkel a karit iti 19th Congress.
