LAOAG CITY – Inlawlawag ni Atty. Joel Gines, ti Provincial Election Supervisor a saan a basta ti pannaka-ikkat ti nagan dagiti botante a pimmusayen iti listaan.
Segun kenni Gines, saan a maamoan ti Comelec no saan nga agreport wenno mangisubmitir ti updated list ti Local Civil Registrar (LCR).
Inbatad na pay a saan met a maamoan ti LCR a natayen ti maysa a botante no sabali a lugar ti nakatayan na no saan a mismo a pamilya ti mangipakammo ken mangpaneknek daytoy.
Inpalgak na a saan a basta agikkat ti Comelec ti nagan gapo ta amangan no sibibiag pay laeng ti maikkat ket dakdakkel a perwisyo.
Kunana a no saan man a maikkat ti nagan dagiti pimmusayen a botante, adda dagiti safety measures tapno maliklikan a mausar ti nagan dagitoy intono eleksyon.
Karaman ditoyen ti naiget a panagbantay dagiti watchers ken amin nga agserbi intono election, ken saan a basta agdoble nga agbutos ti maysa a tao nangruna ket adda met ti indelible ink a maipan iti kuko ti ramay a saan a nalaka a maikkat.
