LAOAG CITY – Naiwayat ti public hearing maipanggep iti panawagan dagiti tricycle drivers ken operators ditoy siudad ti Laoag a maipangato ti plete ti tricycle, gapu iti panagngato dagiti gastos ti gasolina iti panagbiaheda.
Segun ken ni Sangguniang Panlungsod Member Jaybee Baquiran, idi pay laeng Marso 19, 2026 ket addan ti kiddaw dagiti operator a maipangato ti plete, ngem naitantan daytoy gapu iti pannakaipaay ti subsidy kadakuada manipud iti national government ken ti City Government.
Mainaig iti daytoy, ti regular a plete ditoy siudad ket 20 pesos para iti regular a riding public, bayat a 15 pesos met para kadagiti senior citizen, PWDs ken estudiante.
Iti nasao a kiddaw dagiti operator, kalikagumda nga ipangato ti lima a pisos iti plete.
Inbatad ni Baquiran a masapul pay a maikonsiderar ti point-to-point fare, nangruna ta adda ti manarimaan a pagibasbasaran ti plete iti kada kilometro.
Nupay kasta, masapul a masigurado a maipatungpal ti aniaman a paglintegan babaen ti ordinansa ti Sangguniang Panlungsod.
Innayonna pay a kitaenda no mabalin nga iti lokal a gobierno ti insigida a pagreklamoanda no adda dagiti report a nalabes iti panagsingirda iti plete gapu ta iti agdama, dagiti kakastoy nga pasamak ket iti traffic division iti maseknan nga ahensia a pagreportan ket dagiti opisial iti konseho ditoy suidad .
Impakaammona pay a ti panangited ti kanayunan a plete dagiti pasahero ket boluntario, ngem no ma-normalize wenno bumaba ti presio ti gasolina wenno krudo, mabalin met a sumurotda iti panagpababa ti plete.
