LAOAG CITY – Pimmusay ti maysa a seaman kalpasan a napalto-paltogan iti Barangay Garreta iti ili ti Badoc.
Nabigbig daytoy a ni Jose Joy Bilo, adda iti umno nga edad, addaan ti asawa, tubo iti Iloilo ken residente iti Barangay Pasoc iti nasao nga ili, ken maysa a chef iti barko.
Iti inisyal nga impormasyon a nakalap ti Bombo Radyo, napan nakitienda ti biktima para iti kasangay ti anak na intono Abril 2, ken kalpasan a naipan na ti dagiti ginatang na iti lugan na ket napan iti paglakoan ti niyog ken ditoy metten a pinalto-paltogan dagiti saan pay a nabigbig a suspek.
Gapo iti daytoy, natmaan ti barukong ken timid ti biktima.
Naamoan a nakasuot ti helmet ti driver ti motorsiklo ken ti mismo nangpaltog ket nakaabungot, ken dagitoy ket dagus a naglibas nga agpaabagatan kalpasan ti krimen.
Mainaig iti daytoy, inbatad met ni Mrs. Imelda Barkancel, katugngan ti biktima nga awan ti ammo da a rason a mapaltogan daytoy rason a patyen da a saan nga isu ti mismo a target ti riding in tandem suspect.
Inpalgak met ni Mrs. Mylene Corpuz, ti ikit ti biktima a narigat da nga awaten ti pannakapapatay ti maseknan nangruna ket awan met ti karirriri na.
Kunana a nakigtot da laengen idi nadamag da a napaltogan ti biktima isut gapo na a mariribukan da no apay a napasamak daytoy.
Iti agdama ket agtultuloy pay laeng ti imbestigasyon dagiti otoridad tapno madeterminar no anya ti motibo ti pammaltog ken tapno mabigbig dagiti suspek, kasta pay ti pannakaestablisar dagiti CCTV footages a makatulong kadakuada.
