LAOAG CITY – Maysa ti natay ken pito dagiti nasugatan iti napasamak a desgrasya iti sangwanan ti Nagsanga Elementary School, bisinidad ti Barangay Nagsanga iti ili ti Pasuquin.
Binigbig ni Police Major Vencioly Luzano, ti chief of police ti PNP-Pasuquin ti natay a ni Sancho Chavez Bianzon, agtawen ti 53, maysa a negosyante, ken daytoy ti nakatugaw iti abay ti driver.
Dagiti met nasugatan ket agtawen ti maysa, tallo, lima, siyam, 11 ken ti asawa ti natay nga agtawen ti 27 pakairaman pay ti driver a ni Erwin Jay Chavez Tapang, agtawen ti 33.
Segun kenni Luzano, naggapo ti nasao a pamilya idiay Santiago, Isabela ken agturong da kuma ditoy ciudad ti Laoag para iti maysa a pasken.
Inbatad na nga adda pay ti kakadua dagiti biktima a kabagyan da ken nakalugan iti sabali a behikulo.
Iti inisyal nga imbestigasyon, inadmitir ti driver a nakaturog isuna rason ti pannakapukaw na ti kontrol iti manibela agingga a naidungpar iti poste ti kuryente.
Gapo iti daytoy, nagsagaba ti sugat dagiti biktima ken naitaray dagitoy iti Gov. Roque Ablan Senior Memorial Hospital ditoy ciudad babaen kadagiti nagresponde ngem naideklara a dead on arrival ni Sancho.
Nagtalinaed met iti nadakamat nga ospital dagiti nasugatan a biktima.
Iti agdama, agtultuloy ti imbestigasyon dagiti otoridad seknan iti nasao nga insidente.
