LAOAG CITY – Inyuswat ti team Fariñas ken dagiti supporters da ti March for Peaceful Election itay bigat.
Nangrugi daytoy iti bypass road iti intersection ti Lapaz road agingga iti sangwanan ti kapitolyo probinsyal.
Daytoy ket kalpasan dagiti sumagmamano a pasamak no sadinno ket patien da a paset daytoy iti pannaka-harass ti grupo da.
Narway met a supporters ti grupo dagiti nakipagpaset no sadinno ket nangrugi daytoy babaen iti panagmartsa da ken adda ti aktibidad iti Aurora Park.
Simmango a mismo dagitoy iti Kapitolyo Probinsyal kageddan ti panangiyapela da ti natalna na eleksyon.
Gapo iti daytoy, dagus met a naideploy dagiti kameng ti Philippine National Police (PNP) tapno maipasigurado ti natalna a pannakaisayangkat ti aktibidad ti grupo ti Fariñas.
Maipalagip nga inakusaran ti grupo a paset ti pannaka-harass ti grupo da ti maipagarop a kanayon a panangiyuswat ti checkpoint ti PNP no tunggal agpaawag da ti taripnong, pannakaipatulod ti bala ken surat nga arig na pammutbuteng dagiti sumagmamano nga opisyal, kasta pay ti nagigiddan a pannakaisayangkat ti search warrant operation ken ti pannakabal-bakal ti lugan ti maysa kadagiti kandidato da.
