LAOAG CITY – Inyistorya ni Mrs. Marisol Geronimo iti Barangay Rioeng ditoy ciudad ti Laoag ti kapadasan na iti panagpapirma da ti Certificate of Indigency iti kapitan.
Segun kenni Geronimo, ti nasao a sertipikasyon ket kasapulan ti anak na paa iti Food Subsidy na iti panagtrabaho na kenni Cong. Ria Fariñas.
Nupay kasta, kunana nga idi napan da nagpapirma iti anak na iti barangay hall ket maipagarop a nagkedked ti kapitan nga agpirma.
Malaksid iti daytoy, kuna ni Geronimo nga idi naamoan na a para iti food subsidy manipud iti Fariñas ket maipagarop a naibaga ti kapitan nga ad-adda manen a saan a mabalin nga agpirma ken adda ti nadakamat ti opisyal a panagibunong.
Gapo iti daytoy ket nasakit ti nakem ni Geronimo iti kapitan ken inakusaran na ti opisyal nga isuna ti maipagarop a nagibunong.
Mainaig iti daytoy, immapela ni Geronimo a rumbeng kuma nga ag-move on ti kapitan manipud iti resulta ti eleksyon ken aramiden na ti trabaho na kas mangidaulo iti barangay da.
