LAOAG CITY – Ad-adda pay a pinaigetan ti Philippine National Police (PNP) iti ili ti Pagudpud ti isaysayangkat da a checkpoint.
Daytoy ti inbatad ni Police Lt. Beejay Calavoso, ti deputy chief of police iti nasao nga ili.
Inlawlawag ni Calivoso nga inbilin ni Provincial Director Police Col Julius Suriben ti panangpaiget da ti isaysayangkat da a checkpoint kalpasan nga adda ti report nga adda manen ti kaso ti Africa Swine Fever (ASF) iti probinsya ti Cagayan.
Inbatad na a kalikagom ti Provincial Director nga awan ti maiserrek a karne ti baboy ditoy Ilocos Norte nga apektado ti ASF virus.
Innayon na a no adda dagiti maduktalan da nga agiserrrek ti karne ti baboy nga awan ti permit na ket kumpiskaren da a dagus.
Nupay kasta, inpakaammo ni Calivoso a sipud pinaigetan da ti ipatpatungpal da a checkpoint ket awan pay dagiti natiliwan da a naggandat nga agiserrek ti karne ti baboy ditoy probinsya.
