LAOAG CITY – Maisayangkat ti Trade Exposition para iti Womens Business Council idiay Manila.
Inlawlawag ni Mrs. Elma Gabriel, ti mangidadaulo ti Provincial Small and Medium Enterprise Office nga adda dagiti napili a produkto dagiti MSME’s ti probinsia a maitampok iti nasao nga aktibidad.
Namnamaen na nga iti daytoy a panagatendar da iti expo ket adda manen dagiti mabirukan da nga agpupuunan nga umay manen aggatang kadagiti produkto ti probinsia.
Mainaig iti daytoy, agtultuloy ti panangtultulong ti gobierno probinsial babaen iti SME Office a mangitandudu kadagiti produkto dagiti babassit a negosiante ditoy probinsia.
Gutgutiguten ti Gobierno Probinsial dagiti maseknan a makikoordinar iti nagdumaduma a lugar para iti pannakipaset ti probinsia kadagiti exhibit ken exposition.
Inbatadna a dakkel a tulong daytoy iti pannakaitandudu dagiti produkto ti probinsia kadagiti “investor”.
Malaksid iti daytoy, kunana a maiyammo pay kadagiti sabali a lugar dagiti produkto ditoy probinsia.
Innayonna a ti nasao nga aktibidad ket maiyuswat sakbay nga agtapos ti agdama a bulan.
