LAOAG CITY – Umabot iti sangaribu walo gasut a bakawan ti naimula iti Brgy. Davila iti ili ti Pasuquin iti pannakidanggay ti gobierno probinsial iti pannakaobserbar ti National Disaster Resilience Month.
Kaipapanan daytoy a dandani nagdoble ti kaadu ti plano a maimula a bakawan a sangaribu iti babaen ti pammalubos ni Gob. Matthew Marcos Manotoc.
Mamati ni Mr. Michael Pebenito ti Provincial Resiliency Office nga aglawa iti maysa nga ektaria ti namulaan ti bakawan iti nadakamat a lugar. Inbunannagna nga iti kalawan ti namulaan ket mabalinen nga ipagpannakkel ti probinsia ti nasao a lugar kadagiti turista.
Inbatad na nga in-inuten a matun-uyan ti kalikagum ni Senador Imee Marcos idi isu pay laeng ti gobernador ti probinsia a mamagbalin iti nadakamat a lugar a “tourist destination”.
Inlawlawag na a karaman kadagiti nadumaduma a pangopisinaan ti gobierno probinsial a kinadua ti opisinada a napan nagmula idiay Brgy. Davila ket ti provincial assessors office, provincial social welfare and development office, provincial engineering office, communications and media office, general services office provincial environment and natural resources office pakairamanan dagiti nagduduma nga ahensia ti gobierno kas iti PNP, BFP, PCG, Phil. Army, Barangay Ranger Officers, dagiti pannakabagi ti gobierno munisipal ti ili a Pasuquin ken dagiti barangay officials ti Brgy. Davila.
Kabayatanna, inpakaammo ni Pebenito a malaksid iti panagmula ti bakawan ket nangisayangkat pay dagitoy ti “coastal clean-up” wenno panagdalus iti igid ti baybay a nakaukkonanda ti siyam a sako ti basura.
