LAOAG CITY – Sumango iti nagduduma a kaso ti maysa a Filipino-American Citizen kalpasan ti napasamak a desgrasya iti paset ti Brgy. Buyon iti ili ti Bacarra.
Binigbig ni PMaj. Arnel Tabaog, ti hepe iti PNP-Bacarra ti suspek a ni Joe Acio y Madamba, agtawen ti 68 naggapo iti Hawaii ken agnanaed iti Brgy. Ngabangab iti ili ti Pasuquin.
Kuna ni Tabaog a bayat nga agpaamianan ti suspek a nangiturong iti SUV ket kellaat a naawanan ti kontrol iti manibela bayat a dumaldalyasat iti kalsada.
Gapu iti daytoy, nadungpar na ti nakaparada a kotse ti pulis iti igid ti kalsada ken daytoy met ti naidungpar iti kawasaki a motor ti PNP ken naidungpar iti protect box ti kapulisan.
Inbatad na a dagus a nagresponde dagiti nakaduty a pulis ken nakisarita da iti suspek ngem namagsasaw-an na laeng dagitoy.
Naamoan nga adda iti impluwensya ti nasanger ti suspek idi napasamak ti insidente.
Mainaig iti daytoy, inpakaammo ni Tabaog a sumango daytoy iti kaso a reckless imprudence resulting to damage to property, reckless imprudence resulting to damage to government property, RA 10586 wenno Anti-Drunk and Drugged Driving Act of 2013.
