LAOAG CITY – Nagsagaba ti sugsugat ti maysa a lalaki kalpasan a natagtagbat iti Barangay Isic-Isic iti ili ti Vintar.
Binigbig ni Police Major Reginaldo Dalipias Jr., ti Chief of Police iti ili ti Vintar ti biktima a ni Jordan Nagtalon, addaan iti umno a tawen, idinto a ti suspek ket ni Nelson Pimentel, agpada dagitoy a residente iti nadakamat a barangay.
Inbatad ni Dalipias a basar iti imbestigasyon da, ti biktima ket maipagarop nga adda ti diperensya ti panagpanpanunot na.
Naamoan da pay a ti biktima ket kanayun nga agprob-probokar ken agubur-ubur kadagiti pagtaengan iti nasao a barangay.
Innayon ni Dalipias a mabalin nakapungtot ti suspek kalpasan a maipagarop a ginandat ti biktima a dangran daytoy rason a napan nangala ti buneng ket tinagtagbat na ni Nagtalon.
Naitaray ni Nagtalon iti Governor Roque Ablan Senior Memorial Hospital (GRASHM) ditoy ciudad ti Laoag para iti pannakataming na.
Iti impormasyon a naala ti Bombo Radyo Laoag manipod iti PNP iti ili ti Vintar ket agpapan ita ket nagtalinaed nga awan ti poot ti biktima.
Nagtalinaed met ti suspek iti kustodyar ti pulisya ken manamnama a pilaan da ti maiyannatop a reklamo.
