LAOAG CITY – Inlawlawag ni Mr. Rommel Pascua, maysa a Marine Biology Instructor iti Mariano Marcos State University (MMSU) nga adda dagiti rason no agpakita dagiti dolphins iti baybay.
Inaramid daytoy ni Pascua kalpasan nga adda manen dagiti nagpakita a dolphins iti Pasaleng Bay iti ili ti Pagudpud.
Iti eksklusibo nga interview ken ni Pascua iti programa a Good Morning Philippines, inbatad na karaman kadagiti rason no apay agpakita ti dolphin iti baybay ket mabalin a nagbaliw ti kasasaad ti danom kas ti temperatura iti pagnanaedan na.
Kuna ni Pascua a no agbaliw ti kasasaad ti danom iti pagnanaedan ti dolphin ket ma-stress daytoy a mangitunda iti iyaakar na iti pagnaedan.
Mabalin pay nga umakar iti pagnaedan dagiti dolphins tapno agbiruk ti kaayan-ayat da ken umado ti populasyon da.
Malaksid iti daytoy, mabalin a bassit wenno naibusen ti makan iti pagnanaedan ti dolphin isut gapuna nga agbiruk da iti sabali lugar.
Innayon na a mabalin a ti napili a nagturungan dagiti nagpakita a dolphins ket iti Pasaleng Bay gapu ta basar iti panagsukisok ket maibilang ti lugar kas kabaknangan a baybay ditoy probinsya gapu ta ado ti resources na.
Naamoan a dagiti dolphins ket kaay-ayo da a kanen dagiti nagduduma ti klase na nga ikan, pusit, jellyfish ken dadduma pay.
Mainaig iti daytoy, inbatad ni Pascua a dagiti dolphins ket maibilang kas “threatened species”.
