LAOAG CITY – Rumbeng laeng a masukatan ti 257,817.57 a pisos a mapukpukaw a pondo ti Federation of Senior Citizen Associations of the Philippine (FSCAP) iti ili ti Bacarra.
Segun kenni Retired Col. Delfin Avena, presidente ti (FSCAP), ni laeng Cristeto Subia a treasurer ti federasyon ti otorisado a mangiggem ti kwarta ti nasao a grupo.
Inpetteng ni Avena a saan nga inadmitir ni Subia iti panagsasarita da iti opisina ti Mayor daytoy a banag ngem saan na met a mailawlawag no kasano a napukaw manipud kenkuana ti pondo.
Inlawlawag na nga adda ni laeng Subia ti responsable iti daytoy gapo ta isuna ti agkolkolektar, agideposito ken agwithdraw ken dua da ti agpirma iti withdrawal slip.
Kunana a naduktalan da ti mapukpukaw a pondo kalpasan a rimuar iti resulta ti audit iti period nga Enero agingga iti Hulyo 2022.
Mainaig iti daytoy, kunana nga idi rimuar ti resulta ti audit idi Hulyo 7 ket nangiyuswat da ti taripnong no sadinno ket naikkat ti responsibilidad kenni Subia a mangiggem pay ti pondo ken papeles ti federasyon.
Inbatad na pay nga inikkan da ti pawayway agingga intono Agosto 27 ni Subia nga isubli na ti kwarta a mapukpukaw tapno mausar ti kwarta iti kasapulan ti federasyon da.
Kabayatanna, inbatad ni Avena nga isagsagana da metten dagiti dokumento para iti legal purposes.
