LAOAG CITY – Kalikagom ni Mrs. Angelita Mateo iti Barangay 25 iti ili ti Pasuquin, ina ti OFW a ni Nelson Blosa idiay Saudi Arabia a makaawid ditoy Pilipinas gapo ta nasuroken a makatawen nga arig na ket iligal ti panagtrabaho na.
Segun kenni Mateo, nabalod ti anak na idi 2019 ken nakarwar laeng iti Pebrero 18, 2021 gapo iti maipagarop a panagpost ti madi iti social media.
Inbatad na nga idi nakarwar iti pagbalodan ti anak na ket saanen nga innala ti kompanya a pagtrabtrabahoan na kas construction worker agingga a nag-expire ti IQAMA na.
Kunana a no dadduma ket adda ti mangayab kenni Blaso nga agtrabaho ken ti sweldo na ket isu ti pagbayad na iti up-upaan na a kwarto.
Mainaig iti daytoy, inbatad ni Blosa a napan nagpatulong iti POLO ken embahada ken naibaga na a dagiti papeles na ket adda ditoy pilipinas ken ti IQAMA ID na ket expired, ken ibaon da isuna iti ciudad ti Jubail ken saan da met a natulungan isuna a makaawid.
Inlawlawag na nga iti agdama ket kalikagom na a makaawid nangruna ket marigatan iti sitwasyon na wenno saan a nawaya a makagaraw.
Ummuna iti daytoy, kunana a tawen 2018 idi nagkabasyon ditoy Pilipinas ken idi nagsubli idiay Saudi Arabia ket sabalin ti mangus-usar ti simcard a nakarehistro kenkuana ken rumrumuar nga ado dagiti naipopost a madi iti social media.
Saan met a maibaga ni Blosa no kasano a sabali ti mangus-usar iti simcard na ken saan a denggen ti gobierno ti Saudi ti palawag na a saan nga isuna ti nagpopost.
Iti agdama, mangnamnama ni Blosa nga iti kabiitan a panawen ket makaawid isuna ditoy Pilipinas.
