LAOAG CITY – Inbatad ni Miss Jane Salvador, maysa a mangisursuro iti Cabeza Elementary School ditoy ciudad ti Laoag a nabayagen a saan da nga aglaklako ti junk foods ken soft drinks gapu ta isu ti naiyataday iti Deped order No. 13 series of 2017 nga inparuk-at ti Department of Education Schools Division ditoy probinsiya.
Inlawlawag na nga adda latta dagiti estudyante nga agbalon ti junk foods ngem kasarsarita da dagitoy nga isardeng dan ti mangan kadagitoy gapu ta saan a nasayaat para iti salun-at.
Inrakurak daytoy ni Salvador kalpasan nga inpila ni Senador Lito Lapid ti Senate Bill No. 1231 a mangipawil ti panaglako iti Junk Foods ken sugar drinks kadagiti amin a pampubliko a pagadalan ditoy pagilyan gapu ta patien na nga isu ti solusyon ti child obesity ken malnutrition.
Ginutigot ti mangisursuro dagiti nagannak iti Cabeza Elemetary School a dagiti laeng nasustansya a makan ti ipabalon da kadagiti annak da.
Innayon na nga iti agdama ket planplanwen da kadagiti pada na a mangisursuro iti nasao a pagadalan ti panaglako da kadagiti nagduduma a nasaustansya a makan iti kantina para kadagiti agad-adal a saan a makaitugot ti bukod na a meryenda.
Kabayatanna, inbatad met ni Mrs. Violy Antolin, maysa a nagannak iti nasao a pagadalan a napintas ken nasayaat daytoy nga addang tapno maiyadayo dagiti ubbing iti nagduduma a sakit kas iti panagsakit ti buksit no mapalalwan da ti mangan kadagiti junk foods.
Mainaig iti daytoy, kuna met ni Marcel Alejandro, maysa a Grade 5 student nga ad-adda a pilyen na a balonen dagiti nasustansya a meryenda no mapan iti pagadalan.
