LAOAG CITY – Inlawlawag ni Atty. Juanito Antonio dagiti mabalin nga ipila a reklamo kontra kadagiti agkabsat a babbai a nangkabkabil iti maysa nga estudyante nga atapen da a karelasyon ti live-in partner ti maysa kadagiti suspek.
Segun ken ni Atty. Antonio, karaman kadagiti reklamo a mabalin a maipila kontra kadagiti agkabsat a residente iti ili ti Badoc ket ti slight wenno serious physical injuries, grave threat gapu iti panangipangpangta da iti biktima, ken no makita a nadagsen ti panangipangpangta da ket mabalin a maipursige ti attempted homicide.
Kuna na nga agdepende no ania ti agbalin a resulta ti medico legal ti biktima.
Malaksid iti daytoy, matingiting pay a naimbag no ania ti palawag to ti biktima nga isu ti pagibasaran iti maipila a reklamo kontra kadagiti agkabsat a nangdangran kenkuana.
