LAOAG CITY – Inbatad ni Mr. Fregidio Lorenzo, Presidente ti Ilocos Norte Gaffers Association a naragsak da iti grupo da kalpasan nga inaprubaran ti konseho ti panagsubli ti operasyon ti cockpit arena ditoy ciudad ti Laoag.
Segun kenni Lorenzo, dakkel a benipisyo daytoy kadakuada iti asosasyon da partikular vendors, tadero ken dadduma pay nangruna ket agpabpabasa dagitoy.
Inlawlawag na nga iti kada maudi a Huwebes ti bulan ket adda ti maiyuswat a taripnong ti asosasyon tapno apagsasaritaan ti operasyon.
Mainaig iti daytoy, kunana pay nga agkiddaw isuna iti management dagiti amin a galyeraan a sakupen ti asosasyon da, ti 100 a pisos iti tunggal laban.
Nupay kasta, inpetteng na a ti nasao a kantidad ket saan a maapektaran ti management gapo ta daytoy ket maikissay iti mangabak iti pallot.
Naamoan nga adda ti nasurok 60 a “kristo”, agarop 40 nga stalls met ti paglakoan ken dagiti tadero ket 19 malaksid laeng kadagiti miembro, ken kunana a dagitoy ti mabenipisyaran.
Kabayatanna, kunana nga addan ti innem a tawen a nagsardeng ti cockpit arena ditoy ciudad ti Laoag.
