LAOAG CITY – Nakaawiden dagiti sumagmamano a pamilya iti pagtaengan da kalpasan a nagbakwit dagitoy manipud iti ili ti Cauayan, Negros Occidental gapo iti napasaran a tudo.
Segun kenni Dr. Zeaphard Gerhart Caelian, Provincial Disaster Management Program Division-Negros Occidental Head, nalayos ti Barangay Caliling ken Barangay Inayawan iti ili ti Cauayan gapo iti panagngato ti danom.
Inbatad na nga iti impormasyon a naala dagitoy, agarop 100 nga individual ti nagbakwit iti nasao nga ili.
Nagyaman met ni Caelian gapo ta awan ti high tide idi kalman gapo iti ado a local government units ti naapektaran iti layos.
Binalakdan pay ni Caelian dagiti residente a kitaen ti weather updates ken agkararag tapno maliklikan ti anyman a kaswalidad iti anyman a kalamidad.
Idi laeng kalman, September 25, nangiyuswat ti personnel ti Cauayan Fire Station karaman ti personnel ti Philippine National Police, Philippine Army, Coastguard ken Local Disaster Risk Reduction Management Office (LDRRMO) iti nasao nga ili ti evacuation ken rescue operation kadagiti apektado a pamilya ti panaglayos iti Brgy. Caliling ken Brgy. Inayawan Cauayan, Negros Occidental.
Agtultuloy met ti monitoring ti Local Disaster Risk Reduction and Management Council Operations Center iti ili ti Cauayan iti typhoon bulletin para iti updates ti bagyo Karding tapno dagus a marespondehan ti anyaman nga insidente a mabalin a mapasamak.
