LAOAG CITY – Naipaayan dagiti mangngalap ti ili a Badoc ti fuel subsidy manipud iti Bureau of Fisheries and Aquatic Resources idi Septiembre 23.
Inbatad ni Ms. Vanessa Dagdagan, OIC Provincial Director ti BFAR ditoy Ilocos Norte, tallopulo ket innem dagiti benepisiario iti nadakamat nga ili.
Inrakurak na a dagitoy ti maudi iti umuna a bansada a pannakaipaay ti fuel subsidy kadagiti “coastal towns” ken ti siudad ti Laoag.
Inbunannagna a paset daytoy iti pannakikaysa ti Bureau of Fisheries and Aquatic Resources iti kalikagum ni Gob. Matthew J. Maarcos Manotoc a pannakaipaay ti naan-anay a tulong kadagiti mangngalap ditoy probinsia.
Kunana a tallo ribu a pisos ti naipaay iti tunggal maysa kadagiti lima gasut siyam a pulo ket dua a benepisiario ti umuna a bansada.
Inlawlawag na a karaman ditoy ti 21 a mangngalap manipud iti ili a Bangui, 81 manipud ti ili a Burgos, 105 ti ili a Currimao, 124 ti siudad ti Laoag, 108 ti ili a Pagudpud, 15 ti ili a Paoay ken 102 ti ili a Pasuquin.
Innayonna nga iti agdama ket maisagsaganan ti pannakaipaay ti maikadua a bansada ken manamnama a maiyun-una dagiti mangngalap ti ili a Bacarra.
