LAOAG CITY – Agtultuloy pay laeng ti imbestigasyon ti Philippine National Police (PNP) iti pannakapalto-paltog a nakatayan ti maysa a kameng ti pulisya iti Barangay Saludares iti ili ti Dingras.
Nabigbig ti biktima a ni Police Staff Sergeant Jackson Raymundo, agtawen ti 36, naasawaan, nakabase iti PNP-Dingras ken residente iti Barangay Puttao iti ili ti Solsona idinto a saan pay a nadeterminar ti katatao ti suspek.
Segun kenni Police Major Julius Basallo, ti chief of police ti PNP-Dingras, alaen da amin a mabalin nga anggulo iti krimen ken agpapan ita ket awan pay ti maibaga da nga specific a motibo.
Iti inisyal nga impormasyon, nakaawat dagiti personnel ti PNP Dingras ti mensahe seknan iti nadakamat nga insidente rason a dagus da a napan ken nakita da ti lugan iti irigasyon.
Kinumpirmaran pay ni Basallo a nakita ti biktima iti compartment ti lugan na ken daytoy ti maysa pay kadagiti ammoen da.
Narekobre met iti nakapasamakan ti krimen dagiti kapsula iti saan pay a nadeterminar a klase ti paltog.
Naduktalan pay a maipagarop a mapukpukaw ti service firearm ti nadakamat a biktima a pulis ken isu ti maysa kadagiti birbiruken da ita a gundaway.
Kunana pay nga awan met ti nadakdakamat ti biktima kadakuada nga adda ti pangta iti biag na.
Iti agdama ket manarimaan ti dragnet operation dagiti kameng ti PNP pakairamanan dagiti kabangibang da nga ili.
Mainaig iti daytoy, awan ti ammo a rason ni Mr. Mario Raymundo, ti ama ti biktima no apay a napasamak daytoy iti anak na.
Segun kenni Raymundo, ar-aramiden met laeng ti anak na ti trabaho na kas pulis rason a saan da a ninamnama a mapapatay ti biktima.
Kunana a nakigtot da laengen idi naipadanon kadakuada a napaltogan ti anak da ken naamoan da daytoy itay pasado alas-singko itay parbangon.
Naamoan a ti biktima ket addan iti serbisyo iti 14 a tawen ken addaan ti tallo nga annak.
Kabayatanna, kalikagom ni Mr. Raymundo a makonsensya ken matiliw ti suspek a responsable iti pannakapapatay ti anak na.
