LAOAG CITY – Inlawlawag ni House Deputy Minority Leader ken Bagong Henerasyon Partylist Representative Bernadette Herrera dagiti rason no apay a kalikagom na a maimbestigar ti naginad a roll-out ti national ID.
Iti eksklusibo a pannakinnuman ti Bombo Radyo Laoag kenni Herrera, kunana a saan a naragsakan ken dismayado iti nagbalin a sungbat ti Philippine Statistics Authority (PSA) kabayatan ti budget deliberations ken saan na a maawatan no apay a saan a maibunong a dagus dagiti IDs a nakapatpateg iti maysa a tao.
Inbatad na a ti nagbalin a sungbat kadakuada ti ahensya ket kurang ti printer ti supplier rason a nabayag ti roll-out ngem saan a rumbeng a kastoy ti mapasamak gapo ta nasken a maantisiparan ti supplier no mano ti kasapulan nangruna ket ado metten ti baro a teknolohiya.
Inpetteng na a ti inbaga kenkuana ti ahensya ket maibunong dagiti e-IDs intono Disyembre ken intono Hunyo 2023 ket adon dagiti maited da.
Nupay kasta, saan a kontento ni Herrera iti daytoy gapo ta kumpleto met ti datos dagiti tattao kadakuada ken maipatulod laeng babaen iti email, ken nangruna ket saan pay a deretsa a nasungbatan ti ahensya no anya ti maipataw a pannusa iti supplier gapo iti pannaka-delay dagiti IDs.
Inpalgak na nga otomatiko kuman nga ammo no anya ti pannusa ti sangwen ti supplier nangruna ket adda met t katulagan nga agbalor ti 3.5 bilyon a pisos, saan ketdi nga isuna pay laeng ti magibaga daytoy a banag.
Dinakamat na nga idi pay laeng 2019 daytoy ken manmano pay laeng dagiti naibunong ken dagiti dadduma ket maipagarop a faded kalpasan ti tallo a bulan a kayat na a sawen ket poor quality.
Kunana nga inbaga kenkuana ti PSA a dagiti saanen a malasin ket masukatan ngem kwinestyunaran na daytoy gapo ta nagbayagen nga ur-urayen ti ummuna a bansada ken ado ti backlog ken manayunan manen gapo iti poor quality IDs a naibunong.
Mainaig iti daytoy, maysa pay a concern ni Herrera ket ti maipagarop a saan a panangawat dagiti bangko iti National ID gapo ta awan ti permi na ket arig na awanen ti serbi daytoy nangruna ket bilyon ti gastos ti gobierno.
Kabayatanna, inpanamnama ni Herrera a matutukan daytoy apaman a mangrugi ti imbestigasyon tapno dagus a masolbar ti problema.
