LAOAG CITY – Kinumpirmaran ni Barangay Kagawad Jay-Z Lagundino iti Barangay Pancian iti ili ti Pagudpud a pimmusay ti maysa a manager ti bangko kalpasan a dimmalyasat da iti bantay tapno makaballasiw da kalpasan a nagaburan ti kalsada gapu iti napasamak a landslide iti nadakamat a lugar.
Inlawlawag ni Lagundino nga apaman a nadanun ti biktima ken ti kadwa na iti national highway ket bigla lattan a nagulaw ti maseknan.
Kuna na a naitaray ti manager iti ospital ngem saanen a naidanun a sibibiag.
Inbatad na a mabalin nga adda ti sagsagabaen a sakit ti manager ken gapu iti panagpagna da iti agarop dua nga oras ken nangato pay ti bantay ket nabannog unay.
Mainaig iti daytoy, binalakadan ni Lagundino dagiti agpangpanggep a dumalyasat iti bantay tapno makapan da iti probinsya ti Cagayan a saan da laengen nga ituloy gapu ta delikado iti lugar.
