LAOAG CITY – Nagtalinaed a naka-full alert status ti Philippine National Police (PNP) ditoy probinsya kalpasan ti idadayyeg ti napigsa a gingined idi rabii ti martes.
Daytoy ti inbatad ni Police Col. Julius Suriben, ti Provincial Director ditoy probinsya.
Segun ken ni Suriben, sipud idi Oktubre 25 a pannakarikna ti napigsa a gingined ket naka-full alert status ti nailian a pulisya.
Inbatad na a kalpasan ti gingined ket masapol nga agbalin nga alerto ti Philippine National Police gapu iti possible nga iduduprak ti bagyo Paeng.
Inpakaammo pay ti opisyal nga adda pay dagiti kameng ti pulisya a tumultulong nga agbanbantay tii
Barangay Pancian iti ili ti Pagudpud.
Kabayatanna, inpasigurado ni Suriben nga agtultuloy met ti pannakaipatungpal ti checkpoints iti nagduduma nga ili ken ciudad ditoy probinsya no sadinno a mamintallo a daras iti kada aldaw.
Innayon na a babaen iti daytoy ket mapagtalinaed ti linak, urnus ken talna iti intero nga Ilocos Norte.
