LAOAG CITY – Inbatad ni Police Major Lester Uminyad, mangidadaulo ti PNP Maritime ditoy Ilocos Norte nga agtultuloy ti panagmonitoring da kadagiti coastal areas ditoy probinsya.
Segun kenni Uminyad, iti panagmonitor da ket dadakkel ti dalluyon iti baybay isut gapo na a naiget met ti panangbalakad da kadagiti mangalap a saan pay pay laeng a tumapog wenno agkalap.
Inlawlawag na a maawatan da ti sitwasyon dagiti dadduma a ti panagkalap ti pagbiagan da ngem nasken a sumurot da nangruna ket adda ti gail warning nga inparuk-at ti Pagasa.
Kunana nga awan met dagiti namonitor da a nangipilit a mapan agkalap ditoy probinsya.
Kabayatanna, inbatad ni Uminyad nga adda kuma ti ordinansa nga isu ti iyemplementar da tapno para iti pannakaiparit a tumapog iti baybay nangruna no adda ti ballaag dagiti maseknan nga ahensya.
