LAOAG CITY – Naarestar ti maysa a notorious a lalaki a maibilang a top 1 most wanted person ti probinsiya gapo iti kaso na a panagkarnap.
Segun ken ni Pol. Maj. Joseph Tayaban, ti chief of police iti iti ili ti Badoc, ti suspek ket agtawen ti 33, awanan asawa, konduktor ti bus, ken residente iti Brgy. Napu iti nasao nga ili.
Inbatad na a balligi a natiliw ti suspek babaen iti nagtitipon a puwersa ti Provincial Highway Patrol Team, Provincial Intelligence Unit, 101st Manuever Company ti RMFB1, 2nd Ilocos Norte Provincial Mobile Force, Regional Intelligence Unit Maritime Unit, Pinili Municipal Police Station ken ti PNP-Badoc kas team lead.
Inlawlawag na a nakkemeg ti akusado babaen iti bileg ti warrant of arrest nga inparuk-at ti Regional Trial Court, Branch 40 ti Antipolo City Rizal a nairuwar idi September 20, 2022 gapo iti kaso a panaglabsing iti Section 3 ti Republic Act 10883 wenno “Anti-Carnapping Act of 2016”
Mainaig iti daytoy, kuna ni Maj. Tayaban nga iti naisayangkat nga operasyon ket nagusar da ti body worn camera kas naiyataday iti pagalagadan.
Nairekomendar ti 300,000 a pagpiyansa ti suspek para iti temporaryo a panakawaya-waya na.
Nagtalinaed paylaeng ti akusado iti kustodyar ti Philippine National Police iti ili ti Badoc.
