LAOAG CITY – Inbatad ni Ilocos Norte 1st District Representative Sandro Marcos a nakapagsarita dan iti amana a ni Presidente Ferdinand Bongbong Marcos Jr. pakaseknan iti nangina a singir ti kuryente ditoy probinsia.
Segun kenkuana, timmawag a mismo kenkuana ti Presidente tapno amwen na ti sitwasyon dagiti umili mainaig iti nangina a singir ti kuryente ditoy probinsia.
Kuna ti diputado nga inpalgak ni Presidente Marcos a saan nga “acceptable” ken nangina unayen ti panagsingir ti Ilocos Norte Electric Cooperative kadagiti member consumers a maibilang a padagsen kadagiti umili.
Inlawlawag ti Presidential son nga inkari ni Presidente Marcos a solbaren na ti problema dagiti residente ditoy Ilocos Norte.
Agtalek ni Congressman Sandro iti ama na isut gapuna a mamati a masolbar ti nabayagen a problema dagiti member-consumers iti kooperatiba iti kabiitan a panawen.
Maipalagip nga iti napalabas a bolan ket nasurok laeng a dua a pisos ti nagbabaan ti singir ti kuryente iti kada kilowatt hour banag a nakaragsakan ti kaadduan ngem adda dagiti sumagmamano a member consumers ti saan a napnek.
