LAOAG CITY – Sinungbatan ni Mrs. Divina Concepcion, maysa kadagiti guardian ken dagiti kakadua na iti Child Development Center iti Brgy. 23 ditoy ciudad ti Laoag ti reklamo seknan iti 450 a pisos a kontribusyon para iti Christmas Party.
Segun kenni Concepcion, nailawlawag iti taripnong da a ti 450 a pisos ket saan pay nga isu ti eksakto a bayadan da gapo ta makissayan pay daytoy no adda ti masolicitan dagitoy.
Inpetteng na a bayat ti taripnong ket immanamong da amin dagiti nagannak a nagatendar rason a masdaaw da no apay nga adda ti reklamo.
Patien na a ti nagreklamo iti daytoy ket ti nagannak a saan a nagatendar iti taripnong ken no kuma adda ti saan amaawatan ket pagsasaritaan da a nagannak.
Kunana nga inlista da dagiti agatendar pakairamanan ti 31 a pupils ken nagannak kadakuada ken inraman da dagiti 20 pay nga indibidual kas kadagiti opisyal nga isun to met laeng ti solicitan da.
Inlawlawag na nga ammo da a maiparit ti panagsolicit ngem daytoy ket saan da met a piliten ti maysa nga inidibiual.
Mainaig iti daytoy, kinumpirmaran met ni Ms. Cristina Raymundo, ti Homeroom President a napagsasaritaan da met daytoy ken immanamong da amin.
Kabayatanna, kuna ni Mrs. Zenaida Eugenio, Child Development Worker a bayat ti meeting da ket awan met ti nagbalin a problema seknan iti daytoy a kontribusyon.
Dinakamat na a gapo iti daytoy ket maiyuswat ti emergency meeting intono bigat tapno malawlawagan ti nasao nga isyu.
Inpalgak na a no anya ti mapagnunumoan dagiti nagannak ket isu ti masurot ken mangnamanama a masolbar daytoy a banag.
