LAOAG CITY – Kinumpirmaran ni Mrs. Merlyn Gorospe, Senior Tourism Operations Officer iti City Tourism Office iti Siudad ti Batac a saan pay a naawat dagiti 55 a tricycle drivers a nakipagpaset iti naisayangkat nga Electric and Lights Parade iti Siudad ti Batac ti premyo da.
Immun-una iti daytoy, adda ti naidanun ditoy Bombo Radyo Laoag a reklamo manipod kadagiti concerned citizens a saanda pay a naawat ti premyo da a kwarta idinto a nasuroken a makalawas ti napalabas sipud naisayangkat ti nasao a pasalip.
Segun ken ni Gorospe, adda dagiti inprosesoda a certified list dagiti nangabak iti pasalip nga isu ti masapol para iti pannakaiplastar ti pannakaibunong ti premyo dagiti nakipartisipar iti nasao a programa.
Kunana a daytoy ti rason no apay a saan a dagus a naiyawat ti cash prizes dagiti maseknan a tricycle drivers.
Inbatadna a manamnama nga umawat ti 13 a ribu a pisos ti nakagun-od iti umuna a puesto, 11 a ribu a pisos ti maited iti maikadua a puesto ken 9 a ribu a pisos ti maiyawat iti maikatlo a puesto idinto nga adda ti sag-tatallo a ribu a pisos a consolation prize dagiti 52 a tricycle drivers.
Inpasiguradona a maited dagiti premyo kadagiti maseknan ita a lawas no sadinno a naipakaammon daytoy a banag kadagiti nasao a tricycle drivers.
Maipalagip a naisayangkat ti Electric and Lights Parade iti Siudad ti Batac kas paset ti panangrambak ti fiesta iti nasao a Siudad idi Disiembre 8 iti agdama a tawen.
