LAOAG CITY – Umabot iti 100 a boga ti adda ita iti kustudyar ti Philippine National Police ditoy probinsya.
Segun kenni Police Col. Julius Suriben ti Provincial Director ti Ilocos Norte Police Provincial Office (INPPO), boluntaryo a naisuko dagiti nasao a boga kadagiti nagduduma nga istasyon ti pulisya.
Inbatad na a kaadoan ket manipud iti Badoc, pakairamanan pay iti ili ti San Nicolas ken ditoy ciudad ti Laoag.
Mainaig iti panangsarabo ti baro a tawen, nagpalagip ni Suriben iti publiko kangrunaan kadagiti addaan ti motorsiklo a saan da nga agus-usar ti open pipe wenno dagiti natatagari a tambutso.
Malaksid iti daytoy, pinalagipan pay ni Suriben dagiti gun holder ditoy probinsya a saan da nga agpaputok ti paltog bayat ti panangsarabo ti baro a tawen.
