LAOAG CITY – Nagballigi dagiti otoridad a nangtiliw iti maysa a wanted person iti Brgy. Tamdagan iti ili ti Vintar.
Ti akusado ket agtawen ti 45, naasawaan, taga Brgy. Dangan, Riena Mercedez, Isabela ngem agdama nga agnanaed iti Brgy. Namuroc iti ili ti Vintar.
Natiliw ti akusado babaen ti bileg ti Alias Warrant of Arrest nga inparuk-at ni Hon Judge Ramon A Pacis iti Regional Trial Court (RTC), Branch 14 ditoy ciudad ti Laoag a napetsaan ti Nobyembre 20, 2002 gapu iti kaso na a panaglabsing iti Republic Act (RA) 6425 wenno Possession of Drug Paraphernalia.
Nairekomendar ti 60 ribo a pisos a piyansa ti akusado para iti temporaryo a pannakawaya-waya na.
Nagtalinaed ti akusado iti kustodyar ti Philippine National Police iti ili ti Vintar.
Naamoan a ti akusado ket napan naglemmeng idiay Isabela ngem napan nagselebrar ti paskua iti ili ti Vintar nga isu metten ti pannakatiliw na.
