LAOAG CITY – Inlawlawag ni Mr. Virgilio Damo iti Barangay Sta. Monica iti ili ti San Nicolas a nabayagen nga awan ti taraken na a baboy.
Segun kenni Damo, tawen pay 2021 idi nagsardeng a nagtaraken ti baboy gapo ta saan da a mapadakkel rason a nagdesisyon a saan dan nga ituloy ti panagtaraken.
Inbatad na nga idi adda ti taraken na ket binisita met ti biang ti sanidad iti lokal a gobierno ti pagtaraknan da ken naibilin idi nga agaramid ti septic tank nga isu met ti inaramid na.
Gapo iti daytoy ket masdaaw ni Damo no apay nga iti pagtaraknan na idi ti baboy ti maitudtudo a pagapgapoan ti mairekreklamo a maipagarop a nabangsit nga angot.
Mainaig iti daytoy, inbatad ni Barangay Chairman Joel Aliga nga idi nangrugi ti pamilya Damo nga agtaraken ti baboy ken rimuar met ti isyu iti nabangsit nga angot ngem adda met ti addang nga inaramid ti barangay pakairamanan ti lokal a gobierno.
Inpetteng na nga amin a nairekomendar ket inaramid met ti maseknan, ken gapo ta idi timmaod ti sakit nga African Swine Fever (ASF) ket napabutngan ni Mr. Damo rason nga insardeng dan.
Kabayatanna, kuna ti kapitan nga iti pannakaiyuswat ti taripnong dagiti agtartaraken iti barangay ket naibaga no anya dagiti rumbeng a suruten dagitoy tapno awan ti tumaod a problema.
