LAOAG CITY – Inlawlawag ni Police Lt. Col. Adrian Gayuchan, ti chief of police iti ciudad ti Batac a saan nga establisimiento ti naserrek no di ket adda ti maysa a babai a maipagarop a natakawan ti pitaka kabayatan ti panagturong na iti nagduduma a pasdek negosyo ken iti tiendaan iti ciudad.
Inbatad na a napasamak paylaeng daytoy idi disyembre 30 iti napalabas a tawen.
Segun kenkuana, iti imbestigasyon da ket nakita laengen ti biktima a mapukpukaw ti pitaka na ken arigna adda ti bassit nga iwa ti bag na.
Inpakaammo na nga iti panangrebisar da ti nakamontar a CCTV camera iti maysa nga establisimiento a simrekan ti biktima ket nakita da nga adda ti tallo a babbai a nakapalawlaw iti maseknan.
Nupay kasta, saanda met a nakita a dagitoy ti nangala iti pitaka ti biktima ken ti pigis iti bag na ket saanda a sigurado no naiwa gapu ta bassit laeng.
Innayon na a basar iti biktima ket naglaon ti pitaka na iti tallo ribo a pisos.
Kabayatanna, inkari ni Gayuchan nga itultuloy da ti naiget a panagbantay da kadagiti nagduduma nga establisimiento iti ciudad ti Batac tapno saanen a maulit ti nasao a pasamak.
