LAOAG CITY – Inlawlawag ni Mr. Gerald Gallardo ti Dept. of Interior and Local Government (DILG) Director ditoy Ilocos Norte nga agdepende iti barangay no mano ti singiren da kadagiti ipaay da a serbisyo wenno nagduduma a dokumento.
Nupay kasta, inpetteng ni Gallardo a masapol a reasonable ti singiren ti barangay ken maiyannatop iti serbisyo nga ipaay kadagiti residente.
Segun kenni Gallardo, awan ti naikeddeng iti Local Government Code no mano ti singiren ti barangay ngem masapol a maikonsiderar ti capacity ti agbayad ken ti kalidad ti serbisyo nga ipaay.
Inpalgak na a no adda ti ordinansa iti barangay ket ireview pay laeng ti City wenno Municipal Sang. tapno madeterminar no saan a maikontra daytoy iti ordinansa ti ciudad wenno ili ken awan ti nalabsing iti national law.
Malaksid iti daytoy, kunana no saan a consistent dagiti probisyon ti ordinansa ket mabalin a maideklara a void wenno invalid ken saan a maipatungpal daytoy agingga a masurot ti rekomendasyon seknan iti daytoy.
