LAOAG CITY – Inpakaammo ni Sangguninag Panlungsod Member Atty. Jason Perera ditoy siudad ti Laoag a saan a ti arungaing dagiti tricycle drivers ti nangiduron iti konseho tapno maadal ti baro nga ordinansa a mangipangato ti singir iti plete.
Kuna ni Perera a gapu iti pannakaipangato ti minimum wage dagiti mangmangged ket nasken nga adda met ti pagngataon ti singir iti plete tapno balanse ti ekonomiya.
Mainaig iti daytoy, inbatad ni Perera a nu bilang maipasa ti main-inaw nga ordinansa seknan iti pannakaipangato ti plete ket awan ti masingir kadagitii pasahero nga agtawen ti lima agpababa.
Immuna iti daytoy, inpakaammo ni Perera a basar iti maad-adal nga ordinansa ket 20 pesos ti plete iti regular a pasahero para iti umuna a 1.5 a kilometro.
Kabayatanna, 15 pesos ti plete dagiti senior citizens ken estudyante.
Inbunannag ni Perera a nu bilang maaprubaran ti baro anga ordinansa ket adda iti probisyon a naiget a maipawil ti nalabes a panagsingir iti plete pakairamanan ti arkila system.
Ginutigot na ti ride in public a nu man adda dagiti agbalin a problema apaman a maipatungpal ti baro nga ordinansa ket dagus nga ipakaammo kadagiti otoridad.
