LAOAG CITY – Kumpirmado a saanen a maisayangkat ditoy Ilocos Norte ti Balikatan Exercises a pagkammayyetan dagiti armada ti pagilian a Pilipinas ken Estados Unidos.
Pinasingkedan ni Gob. Matthew Marcos Manotoc a naiyakar ti lugar a pakaiyuswatan ti nasao nga aktibidad.
Nupay kasta, impalgakna nga ituloy ti armada ti Estados Unidos ti karina a tumulong iti pannakaipasdek ti Health Center iti Brgy. San Joaquin ti ili a Sarrat.
Inlawlawagna a daytoy ti maysa kadagiti kangrunaan a rason nga adda dagiti makitkita ditoy probinsia a kameng ti armada ti US.
Mainaig iti daytoy, mangnamnama ti gobernador a dakkel a tulong ti nasao a pasilidad iti pannakatagiben ti salun-at saan laeng a dagiti taga ili a Sarrat ngem kadgiti kaparangetna a lugar.
Immun-una ngem iti daytoy, naituding a maiyuswat ti Balikatan Exercises ditoy probinsia kangrunaanna ti ili a Burgos iti daytoy a bulan ti Abril.
