LAOAG CITY – Naisentro ti naisayangkat a taripnong dagiti Municipal/City Nutrition Action Officer iti nadumaduma nga ili ken siudad ditoy probinsia iti “Monitoring and Evaluation of Local Level Plan Implementation” wenno MELLPI.
Segun ken ni Mrs. Elma Irapta, Provincial Nutrition Action Officer ti Ilocos Norte a daytoy ket pakaseknan iti pannakatingiting dagiti amin nga ili ken siudad pakairamanan ti sumagmamano a barangay mainaig iti ipatpatungpal dagitoy a programa iti benneg ti nutrisyon.
Malaksid iti daytoy, kunana a napagsasaritaanda pay ti pakaseknan dagiti simmayaatan iti “nutritional status” wenno kasasaad ti nutrisyon dagiti ubbing iti kagimongan.
Inbunannagna a tinawen a maisaysayangkat ti nasao nga aktibidad babaen iti Provincial Nutrition Committee ken adda dagiti napusgan a mangbukel iti Provincial Nutrition Evaluation team.
Kunana a naituding iti masungad a bulan ti Hunio a panangbisita manen dagitoy kadagiti amin nga ili ken siudad ditoy probinsia.
Inlawlawagna nga adda ti maus-usar a “tool” iti pannakatingiting dagiti nadumaduma nga LGU ken daytoy ti maysa kadagiti kangrunaan a rason a naisayangkat ti taripnong dagitoy tapno maipakaammo kadagiti maseknan dagiti nagbaliwan dagiti mausar a tool tapno makapagsagana dagitoy iti masungad nga evaluation.
Iti baet daytoy, inpakaammo ni Irapta a basar kadagiti Municipal/City Nutrition Action Officer ket sumaysayaat iti tinawen ti “nutritional status” kadagiti bukud dagitoy a lugar.
Kabayatanna, impalgakna a naragsakan dagiti Municipal/City Nutrition Action Officer iti inlungalong ni Gob. Matthew Marcos Manotoc a manayunan ti maipaay nga insentibo kadagitoy ken ti iyaadu dagiti maipaayan ti pammadayaw.
Naammoan a paset daytoy iti kalikagum ti gobernador a maapresiar ti probinsia dagiti tignay nga ar-aramiden dagiti nutrition workers a pakaibilangan dagiti nutrition action officers, barangay nutrition scholars ken dagiti nutrition committees iti munisipio wenno siudad ken iti barangay.
