LAOAG CITY – Inbatad ni Engr. Jonathan Corpuz, ti Branch Manager ti National Food Authority ditoy probinsya nga addaan da pay ti buffer stock a 16,333 bags milled rice.
Segun kenni Corpuz, daytoy ket makaanay para iti mapadpadaan nga iduduprak ti bagyo Mawar.
Inlawlawag na a ti nasao nga stock ti ahensya ket agapo kadagiti mannalon ditoy probinsya ken awanen dagiti imported rice nga stock da.
Kunana nga awan met ti nagatang da kadagiti mannalon ita nangruna ket nabababa ti paggatang ti National Food Authority no ikumpara kadagiti traders.
Mainaig iti daytoy, inbatadni Corpuz a saan nga umanay ti stock da agingga iti sumaruno a panaggaapit intono Setyembre.
Nupay kasta, tapno masupusupan ti posible a panagkurang ket mangala da iti Ilocos Sur ken Abra no sadinno dagiti mabayo ket maipan ti ditoy Ilocos Norte.
Kabayatanna, kunana na nga adda idi ti inrekomendar da a buffer stock incentives no sadinno tallo a pisos ti mainayon iti 19 a pisos iti kada a kilo a paggatang ti ahensya ngem saan a naaprubaran daytoy.
Iti laksid daytoy, kunana a mangnamnama da latta a maaprubaran uray para laeng iti target da a 65,000 bags nga irik.
