LAOAG CITY – Natay ti maysa nga indibidual ken tallo dagiti nasugatan iti panagdidinungpar dagiti tallo a motorsiklo iti paset ti Barangay Nalbo ditoy ciudad ti Laoag.
Nabigbig ti natay a ni Clip Vicente, agtawen ti 28 ken residente iti Barangay Puttao ti ili ti Solsona idinto a dagiti nasugatan ket ni Barangay Kagawad Lord Albano, agtawen ti 47 ken ti inlubbon na nga agtawen ti 18, agpada a residente it Barangay 7 ditoy ciudad ti Laoag ken ni Alvin Oriel, agtawen ti 36 ken residente iti Barangay San Andres iti ili ti Bacarra,
Segun kenni Police Staff Sergeant Artemio Magaoay Jr. iti Philippine National Police ditoy ciudad ti Laoag, agpadaya ni Vicente iti Airport Road idinto a dagiti da Albano ken Oriel ket agpalaud.
Inbatad na nga idi nakadanon dagitoy iti nakapasamakan ti desgrasya ket immovertake ni Albano rason a nakadinnungpar na ni Vicente.
Gapo iti impact ti desgrasya, naidungpar pay ti motorsiko ni Albano iti sangwanan a paset ti motorsiklo ni Oriel.
Amin dagiti biktima ket nagsagaba ti sugat iti nagduduma a paset ti bagi da no sadinno dagiti tallo a driver ket naitaray iti Gov. Roque Ablan Sr. Memorial Hospital idinto a ti nailubbon ket naitaray iti Laoag City General Hospital.
Nupay kasta, bayat a maag-agasan iti ospital ni Vicente ket pimmusay idinto a ni Albano ket natukkol ti saka ken abaga na idinto a ni Oriel ket out-patient.
Kabayatanna, agtultuloy met ti imbestigasyon dagiti otoridad seknan iti nasao nga insidente.
