LAOAG CITY – Nagtalinaed iti evacuation center iti Barangay Lanao iti ili ti Bangui dagiti sumagmamano a residente a naibakwit gapo pay laeng iti Bagyo Betty.
Segun kenni Barangay Chairman Freddie Balbag iti nasao a barangay, umabot iti 12 a pamilya wenno 32 nga indibidual a kaadoan ket ubbing.
Inlawlawag na a naibakwit dagiti maseknan gapo ta nababa ti ayan da ken asideg pay iti karayan dagiti pagtaengan da no sadinno masansan a madanon ti danom no adda ti kalamidad.
Inbatad na a nasayaat met ti sitwasyon dagiti maseknan a residente ken kumpleto iti makan ken usaren dagitoy nga ipapaay ti barangay ken lokal a gobierno ti Bangui.
Mainaig iti daytoy, kunana nga ur-urayen da ti mandar no mabalin dan a pagawiden dagiti naibakwit.
Kabayatanna, kuna ti kapitan a dagiti dingwen ket naipan met iti natalged a lugar.
Maipalagip nga idi malem ti Sabado ket inbilin ti chief of police kadakuada nga ibakwit da dagiti residente nga adda iti nababa a lugar.
